200 بھارتی شہری امریکہ سے ڈی پورٹ

 واشنگٹن: امریکا نے ایک بڑے کریک ڈاؤن کے دوران 200 بھارتی شہریوں کو بھارت ڈی پورٹ کر دیا ہے۔ ان میں بدنام زمانہ گینگسٹر انمول بشنوئی، پنجاب کے دو مطلوب فرار ملزمان اور 197 غیر قانونی طور پر مقیم افراد شامل ہیں۔

بھارتی میڈیا کے مطابق انمول بشنوئی گینگ لیڈر لارنس بشنوئی کا چھوٹا بھائی ہے، اور اس پر بھارت میں متعدد سنگین مقدمات درج ہیں جن میں سابق بھارتی وزیر بابا صدیق کے قتل اور سلمان خان کے گھر پر فائرنگ شامل ہے۔

انمول بشنوئی اپریل 2022 میں جعلی پاسپورٹ کے ذریعے بھارت سے فرار ہوا تھا اور امریکا اور کینیڈا کے درمیان جعلی دستاویزات پر سفر کرتا رہا۔ امریکی حکام نے گزشتہ سال کیلیفورنیا میں اسے گرفتار کر کے الیکٹرانک اینکل مانیٹر کے تحت نگرانی میں رکھا، اور اب اسے لویزیانا سے ڈی پورٹ کیا گیا ہے۔

بھارتی میڈیا کے مطابق بابا صدیق کے اہل خانہ نے امریکی حکام کے سامنے قانونی درخواست دائر کی تھی، اور انمول بشنوئی کی ملک بدری کے بعد انہوں نے بھارتی حکام سے مطالبہ کیا ہے کہ دہلی پہنچتے ہی اسے گرفتار کیا جائے۔