روس کا یوکرین پر بڑا حملہ، 25 افراد ہلاک، 73 زخمی

کیف:  یوکرین کے مغربی شہر ٹیرنوپِل پر ڈرون اور میزائل حملہ میں کم از کم 25 افراد ہلاک اور 73 زخمی ہو گئے ہیں، اس حملے میں دو کثیر منزلہ رہائشی عمارتوں کو نشانہ بنایا گیا ہے۔

یوکرین کی وزارت داخلہ نے بدھ کی سہ پہر کو ایک سوشل میڈیا پوسٹ میں بتایا کہ ترنوپل میں، کم از کم 25 افراد، جن میں تین بچے بھی شامل ہیں، ہلاک ہو گئے،73 زخمی ہوئے۔

پولیس کے مطابق روسی فوج کے اس حملے میں زخمی ہونے والے 73 افراد میں 14 بچے بھی شامل ہیں۔ یوکرینی حکام کے مطابق یہ فروری 2022 میں جنگ کے آغاز کے بعد مغربی یوکرین پر ہونے والے مہلک ترین حملوں میں سے ایک ہے۔

روسی فوج کے ان حالیہ حملوں میں دو دیگر مغربی علاقوں کو بھی نشانہ بنایا گیا جن میں لیویو اور ایوانو-فرانکیفسک بھی شامل ہیں، تاہم ایک اور ڈرون حملے میں شمالی شہر خارکیف کے تین اضلاع کو ہدف بنایا گیا جس میں 30 سے زیادہ افراد زخمی ہوئے۔ آن لائن پوسٹ کی گئی تصاویر میں عمارتوں اور گاڑیوں میں لگی آگ کو دیکھا جا سکتا ہے۔