قومی اسمبلی نے ڈومیسٹک وائلنس بل 2025 منظور کر لیا، گالی دینا بھی جرم

 

اسلام آباد: قومی اسمبلی نے بیوی، بچوں اور بزرگوں کے سماجی تحفظ سے متعلق اہم قانون ڈومیسٹک وائلنس بل 2025 منظور کر لیا ہے۔

قومی اسمبلی سے منظور ہونے کے بعد بل کا مسودہ سینیٹ میں پیش کیا جائے گا۔ قانون کے تحت بیوی، بچے یا گھر میں رہنے والے دیگر افراد کو گالی دینا، جذباتی یا نفسیاتی طور پر پریشان کرنا جرم قرار دیا گیا ہے۔

قانون کے اہم نکات:

• جرم کرنے والے کو تین سال تک قید یا ایک لاکھ روپے تک جرمانہ ہو سکتا ہے۔
• معذور یا بزرگ افراد کو تعاقب یا غیر مرضی کے ساتھ دیگر افراد کے ساتھ رکھنا جرم ہوگا۔
• خاندان کے افراد کی پرائیویسی اور عزت نفس کو مجروح کرنا بھی قابل سزا ہوگا۔
• بیوی، بچوں یا گھر کے دیگر افراد کو جسمانی تکلیف پہنچانے کی دھمکی دینا بھی جرم ہوگا۔
• جنسی اور معاشی استحصال بھی اس قانون کے دائرے میں شامل ہے۔
• قانون کا اطلاق بیوی، بچوں، بزرگ افراد، لے پالک، اور ٹرانس جینڈر افراد پر بھی ہوگا جو ایک ساتھ رہتے ہوں۔

واضح رہے کہ یہ بل پاکستان پیپلز پارٹی کی رکن اسمبلی شرمیلا فاروقی نے قومی اسمبلی میں پیش کیا تھا۔