پاکستان ایشیاکپ رائزنگ اسٹار کے فائنل میں پہنچ گیا

ایشیا کپ رائزنگ اسٹار کے دوسرے سیمی فائنل میں پاکستان نے سری لنکا اے ٹیم کو دلچسپ اور سنسنی خیز مقابلے کے بعد 5 رنز سے شکست دے کر فائنل میں رسائی حاصل کر لی ہے۔

قطر کے دارالحکومت دوحہ کے ویسٹ اینڈ پارک انٹرنیشنل کرکٹ اسٹیڈیم پر کھیلے گئے میچ میں سری لنکا ٹیم پاکستان شاہینز کے 153رنز کے تعاقب میں9 وکٹوں کے نقصان پر 148رنز بنا سکی۔

لنکن اوپنرز لاستھ کراسفلے 27اور ویشن ہالام بھاگے کے 29رنز بنانے کے باوجود مڈل آرڈر بیٹرز پاکستانی بالرز کے سامنے جم کر بیٹنگ کرنے میں ناکام رہے۔

لوئر مڈل آرڈر میں شامل میلان رتھنا یاک نے 32گیندوں پر 40رنز بنا کر شاہینوں کے خلاف بھرپور مزاحمت کی تاہم وہ بھی اپنی ٹیم کو میچ جتوانے میں ناکام رہے۔

پاکستانی اسپنرز صفیان مقیم اور سعد مسعود نے نپی تلی بائولنگ سے لنکن بیٹرز کو پریشان کیے رکھا اور 3،3وکٹیں اپنے نام کیں، عبید شاہ، احمد دانیال اور شاہد عزیز کے حصے میں ایک، ایک وکٹ آئی۔

کستان شاہینز نے پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 153 رنز بنائے تھے۔معاذ صداقت نے 23، سعد مسعود اور احمد دانیال نے 22،22 رنز کی اننگز کھیلی۔

سری لنکا کی طرف سے پرامود مدھوشان نے 29 رنز دے کر 4کھلاڑیوں کو پویلین کی راہ دکھائی، تراوین میتھیو نے 3وکٹیں حاصل کیں۔

سعدمسعود کومین آف دی میچ قراردیاگیا۔

ایشیا کپ رائزنگ اسٹار کے پہلے سیمی فائنل میں بنگلہ دیش نے مضبوط حریف بھارت کو دلچسپ مقابلے کے بعد سپر اوور میں شکست دے کر فائنل کے لیے کوالیفائی کیاتھا۔

پاکستان اور بنگلہ دیش کے درمیان فائنل 23 نومبر کو دوحہ میں کھیلا جائے گا۔