وفاق نے اسلام آباد کو فری وائی فائی سٹی بنانے کا ہدف دے دیا

 

اسلام آباد میں عوام کے لیے انٹرنیٹ رسائی بہتر بنانے کے مقصد سے حکومت نے دسمبر 2025 تک 30 فری وائی فائی ہاٹ اسپٹس فعال کرنے کا منصوبہ تیار کر لیا ہے۔ قومی ٹیلی کمیونیکیشن کارپوریشن (این ٹی سی) نے قومی اسمبلی کی قائمہ کمیٹی برائے آئی ٹی کو بریفنگ میں بتایا کہ منصوبے پر تیزی سے پیش رفت جاری ہے اور مقررہ مدت کے اندر تمام ہاٹ اسپٹس کام شروع کر دیں گے۔

حکام کے مطابق یہ منصوبہ حکومت کی اس پالیسی کا حصہ ہے جس کا مقصد ملک میں ڈیجیٹل انفراسٹرکچر کو بہتر اور مضبوط بنانا ہے۔ منصوبے کے تحت اسلام آباد کے اہم مقامات، بڑی مارکیٹوں، عوامی جگہوں اور سرکاری عمارتوں میں وائی فائی ہاٹ اسپٹس نصب کیے جائیں گے، تاکہ شہریوں، طلبہ اور سرکاری ملازمین کو ہائی اسپیڈ انٹرنیٹ تک آسان رسائی میسر ہو سکے۔

این ٹی سی نے مزید بتایا کہ اس وقت وہ ملک کے 100 سے زائد شہروں میں 3 ہزار سے زیادہ سرکاری اور نجی اداروں کو انٹرنیٹ، کمیونیکیشن اور سائبر سکیورٹی کی خدمات فراہم کر رہی ہے۔ حکام کے مطابق اسلام آباد میں فری وائی فائی کا یہ منصوبہ شہر کو ٹیکنالوجی کے اعتبار سے مزید جدید بنانے کی جانب ایک اہم قدم ہو گا۔

اجلاس میں یہ بھی بتایا گیا کہ سی ڈی اے کی ٹیکنیکل ٹیم اس منصوبے کی تکمیل میں این ٹی سی کو مکمل معاونت فراہم کرے گی جبکہ نظام کے آپریشن اور مرمت کی ذمہ داری این ٹی سی کے پاس ہوگی۔

حکام کا کہنا ہے کہ آئندہ چند برسوں میں اسلام آباد کو پاکستان کا پہلا مکمل ’’فری وائی فائی سٹی‘‘ بنانے کا ہدف بھی رکھا گیا ہے۔