پاکستان بار اور سپریم کورٹ بار نے وفاقی آئینی عدالت کے قیام کی حمایت کر دی

 

اسلام آباد: پاکستان بار کونسل اور سپریم کورٹ بار ایسوسی ایشن نے وفاقی آئینی عدالت کے قیام کی کھل کر حمایت کا اعلان کر دیا ہے۔

مشترکہ اعلامیے میں کہا گیا ہے کہ بعض سیاسی دھڑے قانونی کمیونٹی میں تقسیم پیدا کرنے کی کوشش کر رہے ہیں اور ایسے بیانات جاری کر رہے ہیں جو جمہوری نظام کو نقصان پہنچانے کے مترادف ہیں۔ غیر منتخب افراد کے بیانات کی سخت مذمت کی گئی ہے۔

اعلامیے میں مزید کہا گیا ہے کہ پاکستان بار اور سپریم کورٹ بار کا مقصد قومی مسائل پر اداروں کی جانب سے قانونی نقطہ نظر سے بیانات جاری کرنا ہے، اور انفرادی یا اقلیتی بیانات پورے قانونی برادری کی نمائندگی نہیں کرتے۔

وفاقی آئینی عدالت کے قیام کے تحت صوبوں کی مساوی نمائندگی اور آئینی و سیاسی معاملات کی سماعت ممکن ہو سکے گی۔ عوامی مقدمات سپریم کورٹ میں بروقت مقرر اور فیصلہ کیے جا سکیں گے، اور ججز کی تقرری سمیت تمام قانونی عمل کا بغور جائزہ لیا جائے گا۔

اعلامیے میں کہا گیا ہے کہ ضرورت پڑنے پر قانونی برادری اپنے تحفظات اور شکایات جنرل ہاؤسز کے فیصلوں اور قراردادوں کے ذریعے ظاہر کرے گی۔ پاکستان بار اور سپریم کورٹ بار آئین کی پاسداری، قانون کی بالادستی اور عدلیہ کی آزادی کے لیے کھڑے رہیں گے۔