ٹی 20 ٹرائی سیریز: پاکستان نے فائنل میں جگہ پکی کر لی

راولپنڈی:ٹی 20 ٹرائی سیریز میں پاکستان نے زمبابوے کو 69رنز سے  شکست دے کر فائنل میں جگہ  پکی کر لی۔

سہ فریقی ٹی 20 سیریز کے چوتھے میچ میں پاکستان نے زمبابوے کو یکطرفہ مقابلے کے بعد 69 رنز سے باآسانی شکست دے دی۔

پاکستان کی جانب سے دیے گئے 196 رنز ہدف کے تعاقب میں زمبابوے کی ٹیم 19 اوورز میں 126 رنز پر ڈھیر ہوگئی، زمبابوے کی جانب سے ریان برل 67 رنز کے ساتھ نمایاں بلے باز رہے جبکہ کپتان سکندر رضا نے 23 رنز کی اننگز کھیلی۔

زمبابوے کے 9 کھلاڑی ڈبل فیگر میں بھی داخل نہیں ہوسکا، پاکستان کے عثمان طارق نے شاندار بولنگ کی اور 4 اوور میں 18 رنز دے کر چار کھلاڑیوں کو شکار بنایا۔

محمد نواز نے دو، فہیم اشرف، نسیم شاہ اور محمد وسیم نے ایک ایک وکٹ حاصل کی۔

قبل ازیں پاکستان نے زمبابوے کے خلاف ٹاس جیت کا  پہلے بیٹنگ کرتے ہوئے مقررہ 20 اوورز میں 195رنز بنائے،پاکستان کی جانب سے صاحبزادہ فرحان اور صائم ایوب نے اننگز کا آغاز کیا تاہم صائم ایک بار پھر لمبی اننگز کھیلنے میں ناکام رہے اور صرف 13 رنز بناکر 29 کے مجموعی سکور پر پویلین لوٹ گئے۔

اس کے بعد صاحبزادہ فرحان اور بابر اعظم نے شاندار بیٹنگ کی، صاحبزادہ فرحان نے 41 گیندوں پر 3 چھکوں اور چار چوکوں کی مدد سے 63 رنز کی شاندار اننگز کھیلی اور 132 کے مجموعی سکور پر آؤٹ ہوئے۔

دوسری جانب فہیم اشرف رن آؤٹ ہوکر پویلین لوٹے اور پھر بابر اعظم بھی 74 رنز بناکر 163 کے مجموعی سکور پر پویلین لوٹے، پھر محمد نواز بھی چار رنز بناکر پویلین چلتے بنے۔

نئے آنے والے بیٹسمین فخر زمان نے جارحانہ انداز اپناتے ہوئے 10 گیندوں پر 3 چھکوں اور ایک چوکے کی مدد سے 27 رنز کی شاندار ناٹ آؤٹ اننگز کھیلی۔ زمبابوے کی جانب سے سکندر رضا دو کھلاڑیوں کو آؤٹ کر کے نمایاں بلے باز رہے۔

قبل ازیں راولپنڈی کرکٹ اسٹیڈیم میں کھیلے جا رہے میچ کے ٹاس کے لیے زمبابوے کے کپتان سکندر رضا اور پاکستانی ٹیم کے قائد سلمان علی آغا میدان میں اترے۔

ٹاس کے بعد گفتگو کرتے ہوئے قومی ٹیم کے کپتان سلمان علی آغا کا کہنا تھا کہ زمبابوے کواچھا ہدف دینےکی کوشش کریں گے۔

اُنہوں نے مزید کہا کہ زمبابوے کی ٹیم اچھی کرکٹ کھیل رہی ہے، ہمارے کھلاڑی بھی مکمل فارم میں ہیں ،میچ جیتنےکی کوشش کریں گے، آج سالگرہ ہے، اچھی بیٹنگ کرنا چاہتا ہوں۔

زمبابوے کے کپتان کا اپنی گفتگو کر میں کہنا تھا کہ  ٹاس جیت جاتے تو پہلے بولنگ کا فیصلہ ہی کرتے، کوشش ہوگی حریف ٹیم کو کم ازکم ٹارگٹ پر آؤٹ کریں۔

واضح رہے پاکستان اِس سے قبل زمبابوے اور سری لنکا سے ایک ، ایک میچ جیت کر سیریز میں نمایاں ہے۔