کینیڈا: اسکول کی طالبات کو ہراساں کرنے والا بھارتی شہری ڈی پورٹ

 

کینیڈا میں اسکول کی طالبات کو ہراساں کرنے والے بھارتی شہری جگجیت سنگھ کو کینیڈین عدالت نے ڈی پورٹ کرنے اور دوبارہ داخلے پر پابندی عائد کرنے کا حکم دے دیا۔

رپورٹس کے مطابق 51 سالہ جگجیت سنگھ 6 ماہ کے ویزے پر جولائی میں اپنے نومولود پوتے سے ملنے کینیڈا آیا تھا۔ چند ہی دنوں میں وہ اسکول کے باہر موجود لڑکیوں کے قریب جانے لگا، ان سے غیر مناسب بات چیت کرتا اور تصاویر لینے کی کوشش کرتا رہا۔

8 تا 11 ستمبر کے دوران جگجیت سنگھ نے متعدد بار طالبات کو ہراساں کیا اور اسکول کی حدود سے باہر بھی ان کا پیچھا کیا۔ ایک کینیڈین لڑکی نے پولیس کو بتایا کہ وہ پہلے تو تصویر کے لیے راضی نہیں ہوئی، لیکن بعد میں ہاں کر دی۔ تصویر لیتے وقت جگجیت سنگھ بہت قریب آیا اور کندھے پر ہاتھ رکھا جس سے لڑکی خوفزدہ ہو گئی۔

16 ستمبر کو اسے گرفتار کیا گیا اور جنسی ہراسانی اور حملے کے الزامات عائد کیے گئے۔ ضمانت پر رہائی کے بعد دوبارہ گرفتار ہونے پر اس نے عدالت میں ہراسانی کرنے کا اعتراف بھی کیا۔

کینیڈین عدالت نے کہا کہ اس طرح کا رویہ کسی صورت برداشت نہیں کیا جا سکتا اور جگجیت سنگھ کو فوری طور پر ڈی پورٹ کرنے کے ساتھ مستقبل میں کینیڈا میں داخلے پر مکمل پابندی عائد کر دی گئی ہے۔