بالی ووڈ کے لیجنڈ اداکار دھرمیندر 89 برس کی عمر میں چل بسے

بالی ووڈ کے معروف اداکار دھرمیندر 89 برس کی عمر میں انتقال کرگئے۔ دو ہفتوں سے سانس لینے میں دشواری کے باعث اسپتال میں زیرِ علاج تھے اور پیر کو ممبئی کے بریچ کینڈی اسپتال میں چل بسے۔

بھارتی میڈیا کے مطابق دھرمیندر کی رہائش گاہ کے باہر متعدد بالی ووڈ شخصیات اور ان کے اہلخانہ سفید لباس میں پہنچے۔ معروف فلم ساز کرن جوہر سمیت کئی فنکاروں نے سوشل میڈیا پر ان کے انتقال کی تصدیق کرتے ہوئے خراج عقیدت پیش کیا۔

رواں سال اپریل میں اداکار کی آنکھ کی سرجری بھی ہوئی تھی جبکہ انھیں گزشتہ دو ہفتوں میں دو مرتبہ سانس میں تکلیف کے باعث اسپتال منتقل کیا گیا۔ رپورٹس کے مطابق دھرمیندر نے آخری بار فلم اکیس میں اداکاری کے جوہر دکھائے، جو 25 دسمبر کو ریلیز ہونی ہے۔

دھرمیندر نے فلمی کیریئر کا آغاز 1960 میں فلم دل بھی تیرا ہم بھی تیرے سے کیا اور اپنے طویل سفر میں شعلے, یادوں کی بارات, میرا گاؤں میرا دیش, پھول اور پتھر, پھول اور پتلی جیسی شہرۂ آفاق فلمیں پیش کیں۔ 2012 میں حکومتِ ہند نے انہیں پدم بھوشن کے اعزاز سے نوازا۔

وہ پنجاب کے لدھیانہ میں دھرمیندر کیول کرشن دیول کے نام سے پیدا ہوئے۔ 19 سال کی عمر میں انہوں نے پرکاش کور سے شادی کی، بعدازاں معروف اداکارہ ہیما مالنی سے بھی ازدواجی زندگی اختیار کی۔

بڑھتی عمر کے باوجود دھرمیندر سوشل میڈیا پر سرگرم رہے۔ ان کی پوسٹس میں اکثر انہیں فارم کی دیکھ بھال کرتے، ٹریکٹر چلاتے، صحت مند طرز زندگی کی ترغیب دیتے اور مداحوں کو سادگی و مثبت سوچ کے پیغامات دیتے دیکھا گیا۔