آئی سی سی ٹی ٹوئنٹی ورلڈ کپ 2026 کے شیڈول کا اعلان آج ہو گا

آئی سی سی ٹی ٹوئنٹی ورلڈ کپ 2026 کے شیڈول کا اعلان آج ممبئی میں کیا جائے گا۔ ایونٹ 7 فروری سے 8 مارچ تک کھیلا جائے گا اور اس کی میزبانی بھارت اور سری لنکا مشترکہ طور پر کریں گے۔

ذرائع کے مطابق 20 ٹیموں کو 4 گروپس میں تقسیم کیا گیا ہے، ہر گروپ کی ٹاپ 2 ٹیمیں سپر ایٹ مرحلے کے لیے کوالیفائی کریں گی۔ سپر ایٹ مرحلے میں 8 ٹیموں کو 2 گروپس میں تقسیم کیا جائے گا، اور ہر گروپ کی ٹاپ 2 ٹیمیں سیمی فائنل کے لیے کوالیفائی کریں گی۔

پاکستان اور بھارت ایک ہی گروپ میں شامل ہیں، جس میں امریکا، نمیبیا اور نیدرلینڈز کی ٹیمیں بھی موجود ہیں۔ پاکستان اور بھارت کے درمیان میچ 15 فروری کو کولمبو میں ہوگا، جبکہ پاکستان اپنی تمام میچز سری لنکا میں کھیلے گا۔

سری لنکا، آسٹریلیا، زمبابوے، آئرلینڈ اور عمان ایک گروپ میں ہیں، انگلینڈ، ویسٹ انڈیز، بنگلا دیش، نیپال اور اٹلی دوسرے گروپ میں، اور ساؤتھ افریقہ، نیوزی لینڈ، افغانستان، یو اے ای اور کینیڈا تیسرے گروپ میں شامل ہیں۔

بھارت میں میچز کولکتہ، چنئی، دہلی اور احمد آباد میں ہوں گے، سری لنکا میں کولمبو اور کینڈی کے اسٹڈیم میزبان ہوں گے۔ احمد آباد کو فائنل کے لیے منتخب کیا گیا ہے، تاہم پاکستان کے پہنچنے کی صورت میں فائنل کولمبو میں ہوگا۔ سیمی فائنلز ممبئی اور کولکتہ میں ہوں گے، مگر پاکستان کی شرکت پر کولمبو میں منعقد کیے جائیں گے۔