دبئی کی سڑکوں پر سمارٹ مشینیں، مزدوروں کو مفت گرم کھانا فراہم کریں گی

دبئی میں مختلف سڑکوں پر جدید سمارٹ مشینیں نصب کی گئی ہیں جو دن بھر مسلسل کام کرتے ہوئے ضرورت مند مزدوروں کو مفت گرم کھانا فراہم کریں گی۔

دبئی میں اوقاف فاؤنڈیشن کے زیر انتظام محمد بن راشد گلوبل سینٹر فار وقف اینڈ ہبہ کنسلٹیشن نے بتایا کہ یہ مشینیں 2022ء میں شروع کیے گئے منصوبے "خبز السبیل” کے تسلسل میں نصب کی گئی ہیں، جس کے تحت پہلے ضرورت مندوں کو سمارٹ مشینوں کے ذریعے مفت تازہ روٹی فراہم کی جاتی تھی۔

بیان میں بتایا گیا کہ نئی مشینوں کا ڈیزائن جدید ہے، جس میں ڈیجیٹل سکرین، کولنگ سسٹم اور مشین کی حالت، بھراؤ کی سطح اور مرمت سے متعلق سمارٹ فیچرز شامل ہیں۔ صارفین کے لیے سمارٹ شناختی نظام بھی متعارف کروایا گیا ہے، جس کے ذریعے ہر شخص روزانہ ایک کھانا حاصل کر سکے گا تاکہ تقسیم میں انصاف برقرار رہے اور زیادہ سے زیادہ افراد مستفید ہوں۔

اوقاف دبئی کے سیکرٹری جنرل علی المطوع نے کہا کہ یہ مشینیں کئی مساجد کے قریب نصب کی گئی ہیں اور آنے والے مرحلے میں ضرورت کے مطابق مزید علاقوں میں ان کی تعداد بڑھائی جائے گی۔ ان کا کہنا تھا کہ مقصد یہ ہے کہ وقف کے نظام کو جدید اور پائیدار حلوں کے ذریعے فروغ دیا جائے تاکہ امداد باوقار اور آسان طریقے سے مستحقین تک پہنچے۔