پی ٹی آئی رہنما شبلی فراز کو دو مقدمات میں اشتہاری قرار

انسداد دہشت گردی عدالت اسلام آباد نے پی ٹی آئی رہنما شبلی فراز کو دو مقدمات میں اشتہاری قرار دے دیا۔

عدالت کے جج طاہر عباس سپرا کی عدالت میں 28 فروری جوڈیشل کمپلیکس حملہ کیسز کی سماعت ہوئی، جس میں شبلی فراز کی مسلسل غیر حاضری پر انہیں اشتہاری قرار دیا گیا۔

سابق وزیر قانون راجہ بشارت اور دیگر ملزمان عدالت میں پیش ہوئے، جبکہ پی ٹی آئی رہنماوں اور کارکنان کی جانب سے وکلاء سردار محمد مصروف خان اور زاہد بشیر ڈار پیش ہوئے۔

عدالت نے پیش ہونے والے ملزمان کی حاضری کے بعد سماعت ملتوی کردی۔ شبلی فراز اور دیگر پی ٹی آئی رہنماوں کے خلاف تھانہ رمنا میں دو مقدمات درج ہیں۔