مریم نواز کا لاہور میں ایجوکیشن آن ویل پائلٹ پراجیکٹ کا آغاز

 

وزیراعلیٰ پنجاب مریم نواز نے تعلیم کے سفر کو ہر گھر تک پہنچانے کے لیے لاہور میں ایجوکیشن آن ویل کے پائلٹ پراجیکٹ کے آغاز کا حکم دے دیا۔ وزیراعلیٰ کی زیر صدارت اجلاس میں وزراء اور سیکرٹریز نے ہر شعبے کی پرفارمنس پر بریفنگ دی۔

اجلاس میں بتایا گیا کہ تعلیم، ماحولیات، جنگلات، وائلڈ لائف، فشریز، ٹورازم، آرکیالوجی، سپورٹس اور لیبر سمیت ہر شعبے کی جانچ پڑتال جاری ہے۔ وزیراعلیٰ نے پنجاب کے محنت کشوں کے لیے جھنگ اور کمالیہ میں 20 ہزار ورکرز کے لیے 3 مرلے کے پلاٹ دینے اور خصوصی قرضوں کے ذریعے گھر کے خواب کو حقیقت بنانے کے منصوبے کی منظوری دی۔

مریم نواز نے پراجیکٹ کی جلد تکمیل، ریلوے ٹریک، سڑکوں اور نہروں کے کنارے شجرکاری، جنگلات میں آگ کے لیے جدید فائر الارم سسٹم اور غیر قانونی درخت کاٹنے کے واقعات کے فوری سدباب کے اقدامات کی ہدایت دی۔

کھیلوں کے فروغ اور نوجوان ٹیلنٹ کی حوصلہ افزائی کے لیے ہر ماہ چیمپئن شپ ایونٹس کرانے کی بھی ہدایت دی گئی۔ اجلاس میں بتایا گیا کہ پنجاب میں شریمپ فارمنگ کامیابی سے جاری ہے اور فروری 2026 سے پانچ ہزار ایکڑ پر نیا منصوبہ شروع ہوگا، جبکہ 50 ہزار ایکڑ پر شریمپ فارمنگ کا فیسبلٹی پلان بھی طلب کر لیا گیا ہے۔

سیاحت کے فروغ کے لیے ’میگنی فیشنٹ پنجاب‘ ایپ تیار کر لی گئی ہے، جس سے ہر سیاح کو آسانی، سہولت اور پنجاب کی خوبصورتی کی مکمل معلومات میسر ہوں گی۔ وزیراعلیٰ نے ہر ٹورسٹ سائٹ کے لیے مکمل پیکج پلان کی ہدایت دی اور سکول گراونڈز شام کے اوقات میں عوام کے لیے کھولنے کا حکم دیا۔

تعلیمی شعبے میں نوجوانوں کو ٹیکنالوجی سے جوڑنے کے لیے پرائیویٹ یونیورسٹی اور کالجز میں لیپ ٹاپ کوٹہ مقرر کرنے کے لیے تجاویز طلب کر لی گئی ہیں، اور یو ای ٹی میں مقامی سموگ گن کی تیاری پر خوشی کا اظہار کیا گیا۔