سابق برازیلین صدر کی 27 سال قید کی سزا پر عملدرآمد شروع

برازیل: سابق صدر جائر بولسونارو کی بغاوت کی سازش کے جرم میں 27 سال قید کی سزا پر عملدرآمد شروع ہو گیا ہے۔ عدالتی دستاویز کے مطابق 70 سالہ بولسونارو کو فیڈرل پولیس ہیڈکوارٹر میں منتقل کیا گیا، جہاں انہیں قید کیا گیا۔

اس سے پہلے وہ اگست سے گھر میں نظر بند تھے۔ یہ برازیل کی تاریخ میں پہلا موقع ہے کہ کسی سابق صدر کو بغاوت کے جرم میں سزا سنائی گئی ہے۔

برازیل کی سپریم کورٹ نے 2022 میں بولسونارو کو بغاوت کی منصوبہ بندی، جمہوری نظام کو کمزور کرنے، سازش میں حصہ لینے، سرکاری املاک کو نقصان پہنچانے اور تاریخی ورثے کو تباہ کرنے کے الزامات میں قصوروار قرار دیتے ہوئے 27 سال اور 3 ماہ قید کی سزا سنائی تھی۔

ابتدائی طور پر اپیل کے لیے مہلت دی گئی تھی، جس کی وجہ سے سزا فوری طور پر نافذ نہیں کی گئی تھی، لیکن اب عملدرآمد شروع کر دیا گیا ہے۔