طالبان دور میں سرد موسم اور انسانی بحران نے شہریوں کی زندگی مشکل بنادی

کابل: افغانستان میں سرد موسم کے آغاز کے ساتھ ہی ملک شدید انسانی بحران کی نئی لہر سے دوچار ہو گیا ہے، جہاں غربت، بھوک اور بنیادی سہولیات کی کمی نے لاکھوں شہریوں کی زندگی مزید مشکل بنا دی ہے۔

افغان میڈیا "آمو ٹی وی” کے مطابق موسم سرما میں کئی افغان خاندان اپنے بچوں کے لیے جوتے، گرم لباس اور ضروری اشیائے خورونوش کا انتظام نہیں کر پا رہے۔ رپورٹ میں بتایا گیا کہ کئی علاقے میں بچے سخت سردی کے باوجود ناقص کپڑوں اور پا برہنہ زندگی گزارنے پر مجبور ہیں، جبکہ شدید غربت نے شہریوں کی مشکلات میں مزید اضافہ کر دیا ہے۔

کچھ افغان شہریوں نے کہا کہ ان کے پاس نہ کھانا ہے، نہ پانی، اور نہ ہی بچوں کے لیے گرم کپڑے دستیاب ہیں۔ آمو ٹی وی کا کہنا ہے کہ یہ صورتحال افغانستان میں جاری وسیع انسانی بحران کی ایک جھلک پیش کرتی ہے۔

اقوام متحدہ کے اعداد و شمار کے مطابق رواں سال تقریباً 2 کروڑ افغان شہری امداد کے محتاج ہیں اور انہیں فوری انسانی معاونت کی ضرورت ہے۔ رپورٹ میں یہ الزام بھی عائد کیا گیا ہے کہ شہریوں کو تعلیم، روزگار اور بنیادی سہولیات کی کمی طالبان حکومت کی نااہلی اور بدعنوانی کی وجہ سے بڑھ رہی ہے۔