خاتون نے پانی سمجھ کر تیزاب سے کھانا پکا دیا،اہل خانہ ہسپتال منتقل

مغربی بنگال: بھارت کی ریاست مغربی بنگال میں ایک حیران کن اور افسوسناک واقعہ پیش آیا، جہاں ایک خاتون نے غلطی سے پانی سمجھ کر کھانے میں تیزاب ڈال دیا۔

پولیس کے مطابق یہ حادثہ رتنیسور بتی کے رہائشی سانتو کے گھر پیش آیا، جو پیشے کے اعتبار سے چاندی کا کاریگر ہیں۔ گھر میں چاندی صاف کرنے والا تیزاب ایسے برتن میں رکھا گیا تھا جو پانی کے برتن جیسا تھا، جس کی وجہ سے خاتون نے غلطی سے وہی تیزاب کھانے میں استعمال کر لیا۔

اہلِ خانہ کے چھ افراد نے دوپہر کے کھانے کے کچھ دیر بعد طبیعت میں گڑبڑ محسوس کی، اور شدید پیٹ درد، الٹیاں اور سانس لینے میں دقت جیسی علامات ظاہر ہوئیں۔ متاثرین میں 3 بچے اور 3 بالغ شامل ہیں، جنہیں ابتدائی طور پر گھاٹال اسپتال منتقل کیا گیا، جہاں ایک بچے کی حالت تشویشناک بتائی گئی۔

ڈاکٹروں نے فوری طور پر ابتدائی علاج کیا، تاہم صورتحال نازک ہونے پر تمام مریضوں کو بہتر طبی سہولیات کے لیے کولکتہ منتقل کر دیا گیا۔

حکام نے عوام کو ہدایت کی ہے کہ گھر میں موجود تمام کیمیکل یا تیزاب ایسے مقامات پر رکھے جائیں جہاں غلطی کا امکان نہ ہو اور بچے ان تک رسائی حاصل نہ کر سکیں۔ اسپتال انتظامیہ کی جانب سے مریضوں کی تازہ حالت کے بارے میں تاحال کوئی بیان جاری نہیں کیا گیا۔