پاکستان دوبارہ کیمیائی ہتھیار روک تھام کی عالمی ایگزیکٹو کونسل کا رکن منتخب

پاکستان کیمیائی ہتھیاروں کی روک تھام کی عالمی تنظیم (OPCW) کی ایگزیکٹو کونسل کے لیے دوبارہ منتخب ہو گیا ہے۔ پاکستان کو دی ہیگ میں کانفرنس آف اسٹیٹس پارٹیز کے 30 ویں اجلاس کے دوران 2026–2028 کی مدت کے لیے رکن منتخب کیا گیا۔

ترجمان دفتر خارجہ کے مطابق یہ کونسل کنونشن کے مؤثر نفاذ اور اس کی پاسداری کی نگرانی کی ذمہ دار ہے اور رکن ممالک کو سائنسی و معاشی ترقی میں معاونت فراہم کرتی ہے۔ پاکستان 1997 سے OPCW کی ایگزیکٹو کونسل میں خدمات انجام دیتا رہا ہے اور کنونشن کے مقاصد کی تکمیل میں ہمیشہ تعمیری کردار ادا کرتا رہا ہے۔

OPCW دنیا کے سب سے کامیاب تخفیفِ اسلحہ معاہدے کے تحت بڑے پیمانے پر تباہی پھیلانے والے کیمیائی ہتھیاروں کی پوری کلاس کے خاتمے کو یقینی بناتی ہے اور متعلقہ تنصیبات پر باقاعدہ معائنے کرتی ہے۔