گنی بساؤ میں فوج نے ملک کا کنٹرول سنبھال لیا

بسائو:  مغربی افریقہ کے ملک گنی بساؤ میں آرمی نے ملک کا کنرول سنبھال کر صدر کو برطرف کردیا۔ تمام زمینی، فضائی اور سمندری سرحدوں کو بند کرنے اور رات بھر کرفیو لگانے کا بھی حکم دیدیا۔

خبر ایجنسی اے ایف پی کے مطابق  فوج نے اعلان کیا ہے کہ گنی بساؤ پر مکمل طور پر کنٹرول حاصل کر لیا گیا ہے اور  ملک بھر میں انتخابی عمل معطل کر دیا گیا ہے۔

روئٹرز کے مطابق  گنی بساؤ میں سینئر فوجی افسران کے ایک گروپ نے بدھ کے روز کہا ہے کہ انہوں نے صدر عمرو سیسوکو ایمبالو کو ہٹا دیا ہے اور ملک کے متنازع انتخابی عمل کو معطل کر دیا ہے۔ ان کا کہنا ہے کہ آئینی نظام کی بحالی سے پہلے صورتحال کو واضح کرنا ضروری ہے۔

فوجی افسران نے کہا کہ وہ گنی بساؤ کے انتخابی عمل کو معطل کر رہے ہیں اور اس کی سرحدیں بند کر رہے ہیں، یہ بیان دارالحکومت بساؤ میں فوج کے ہیڈکوارٹر میں پڑھا گیا اور سرکاری ٹی وی پر نشر کیا گیا۔ ان کا کہنا تھا کہ انہوں نے "امن کی بحالی کے لیے اعلیٰ فوجی کمان” تشکیل دی ہے، جو اگلے اطلاع تک ملک پر حکومت کرے گی۔