نیشنل ہیرالڈ کیس:راہول اور سونیا گاندھی پر مجرمانہ سازش کا مقدمہ درج

 

نئی دہلی — بھارتی کانگریس کے سینئر رہنما راہول گاندھی اور ان کی والدہ سونیا گاندھی کے خلاف نیشنل ہیرالڈ منی لانڈرنگ کیس میں مجرمانہ سازش کے الزامات کے تحت مقدمہ درج کر لیا گیا ہے۔

 

دہلی پولیس کی اکنامک آفینسز ونگ (EOW) نے ایک نئی ایف آئی آر میں دونوں رہنماؤں سمیت چھ افراد کو نامزد کیا ہے۔ ایف آئی آر میں سم پٹروڈا (Sam Pitroda) اور تین دیگر افراد کے نام شامل ہیں، جبکہ تین کمپنیاں ایسوسی ایٹڈ جرنلز لمیٹڈ (AJL)، ینگ انڈین اور ڈوٹیکس مرچنڈائز پرائیویٹ لمیٹڈ بھی الزامات کی زد میں ہیں۔

 

درج شدہ الزامات کے مطابق ملزمان پر ایسوسی ایٹڈ جرنلز لمیٹڈ پر دھوکا دہی کے ذریعے قبضہ کرنے کی مجرمانہ سازش کا الزام عائد کیا گیا ہے، یہ وہ کمپنی ہے جس کے زیر انتظام کبھی نیشنل ہیرالڈ اخبار شائع ہوتا تھا۔

 

رپورٹ کے مطابق، کولکتہ کی مبینہ شیل کمپنی ڈوٹیکس مرچنڈائز نے ینگ انڈین کو ایک کروڑ روپے فراہم کیے، جس کے بعد ینگ انڈین نے 50 لاکھ روپے کانگریس کو ادا کیے اور اے جے ایل پر کنٹرول حاصل کر لیا۔ اس وقت اے جے ایل کے اثاثوں کی مالیت تقریباً 2000 کروڑ روپے بتائی گئی ہے۔

 

ایف آئی آر 3 اکتوبر کو انفورسمنٹ ڈائریکٹوریٹ (ED) کی شکایت کی بنیاد پر درج کی گئی تھی، جس نے اپنی تحقیقاتی رپورٹ دہلی پولیس کے حوالے کی تھی۔ واضح رہے کہ دہلی کی عدالت نے نیشنل ہیرالڈ کیس کے فیصلے کا اعلان 16 دسمبر تک مؤخر کر دیا ہے۔