پاکستان اور یو اے ای کے تعلقات تاریخی اور برادرانہ ہیں،وزیرِ اعظم

 

وزیرِ اعظم پاکستان محمد شہباز شریف نے کہا ہے کہ پاکستان اور متحدہ عرب امارات کے برادرانہ تعلقات مشترکہ مذہبی و ثقافتی اقدار اور باہمی اعتماد کی بنیاد پر استوار ہیں۔

یہ بات انہوں نے متحدہ عرب امارات کے قومی دن کے موقع پر اپنے پیغام میں کہی۔ وزیرِ اعظم نے کہا کہ دونوں ممالک خطے اور دنیا میں امن، استحکام، ترقی اور خوشحالی کے مشترکہ اہداف کے حصول کے لیے پرعزم رہیں گے۔

وزیرِ اعظم آفس کے میڈیا ونگ کے مطابق، محمد شہباز شریف نے کہا کہ پاکستان کے عوام اور حکومت کی جانب سے متحدہ عرب امارات کے قومی دن پر دلی مبارکباد پیش کرنا ان کے لیے باعث اعزاز ہے۔ انہوں نے بتایا کہ پاکستان اور متحدہ عرب امارات کے تعلقات تاریخی برادرانہ رشتوں میں جڑے ہوئے ہیں جو دونوں ممالک کے لیے فخر کا باعث ہیں۔

انہوں نے کہا کہ یہ تعلقات مشترکہ مذہبی و ثقافتی اقدار اور غیر متزلزل باہمی اعتماد پر مبنی ہیں، جن کی بنیاد مرحوم شیخ زاید بن سلطان آل نہیان کی بصیرت افروز قیادت میں رکھی گئی۔ موجودہ دور میں صدر امارات شیخ محمد بن زاید آل نہیان اور وزیراعظم دبئی شیخ محمد بن راشد آل مکتوم کی قیادت میں یہ تعلقات مستحکم ہیں اور آئندہ بھی دونوں ممالک امن، ترقی اور خوشحالی کے لیے تعاون جاری رکھیں گے۔

وزیرِ اعظم نے مزید کہا کہ اقتصادی، دوطرفہ تجارت، سرمایہ کاری اور دفاع کے شعبوں میں تعاون دونوں ممالک کے عوام کی خوشحالی کے راستے ہموار کرتا رہے گا۔ انہوں نے اس بات پر زور دیا کہ دونوں ممالک کے عوام کے درمیان محبت اور گرمجوشی باہمی الفت کا روشن ثبوت ہیں۔

محمد شہباز شریف نے کہا کہ پاکستان متحدہ عرب امارات کی قیادت کے ساتھ اپنے مضبوط اور برادرانہ تعلقات کو قدر کی نگاہ سے دیکھتا ہے، اور وہاں مقیم پاکستانی بھی دوستی مضبوط کرنے میں مثبت کردار ادا کر رہے ہیں۔ وزیرِ اعظم نے دعا کی کہ دونوں ممالک کے تعلقات آئندہ بھی مضبوط سے مضبوط تر ہوں اور پوری پاکستانی قوم متحدہ عرب امارات کے لیے امن، ترقی اور خوشحالی کی دعاگو ہے۔