یورپی یونین کاپاکستان میں سیلاب متاثرین کےلیے30لاکھ یوروامدادکا اعلان

اسلام آباد: یورپی یونین نے پاکستان میں سیلاب سے شدید متاثرہ آبادیوں کے لیے 30 لاکھ یورو کی اضافی ہنگامی امداد کا اعلان کیا ہے۔

یورپی یونین کی جانب سے فراہم کی جانے والی یہ امداد پنجاب کے ان علاقوں میں خرچ کی جائے گی جو حالیہ مون سون میں سب سے زیادہ تباہی کا شکار ہوئے۔ امداد نقد معاونت کی صورت میں دی جائے گی تاکہ متاثرہ افراد کی بنیادی ضروریات فوری طور پر پوری کی جا سکیں۔

یاد رہے کہ ستمبر میں بھی یورپی یونین نے 10 لاکھ 50 ہزار یورو فراہم کیے تھے، جو صحت، صاف پانی، صفائی اور دیگر ضروری خدمات کے لیے استعمال ہوئے۔

رواں سال کی مون سون بارشوں سے پاکستان میں تقریباً 70 لاکھ افراد متاثر ہوئے، جبکہ 29 لاکھ سے زائد افراد بے گھر ہوئے۔ سیلاب سے ہزار سے زائد اموات ہوئیں اور دو لاکھ سے زیادہ گھروں سمیت زرعی اراضی اور فصلیں شدید نقصان کا شکار ہوئیں۔

یورپی یونین کے حکام کا کہنا ہے کہ یہ امداد عالمی یکجہتی کے جذبے کا مظہر ہے اور متاثرہ خاندانوں کے لیے انتہائی اہم ثابت ہوگی۔ حالیہ امداد کے بعد یورپی یونین کی جانب سے رواں سال پاکستان کو فراہم کی جانے والی کل امداد ایک کروڑ 45 لاکھ یورو سے تجاوز کر گئی ہے۔