سہیل آفریدی سے امریکی قونصل جنرل کی اہم ملاقات

پشاور: وزیر اعلیٰ خیبر پختونخوا سہیل آفریدی سے امریکی قونصل جنرل تھامس ایکرٹ نے وزیر اعلیٰ ہاؤس میں اہم ملاقات کی، جس میں تجارت، سرمایہ کاری، معدنیات، توانائی اور سکیورٹی تعاون پر تفصیلی تبادلہ خیال کیا گیا۔

ملاقات میں انسداد دہشت گردی اور انسداد منشیات میں تعاون کے مواقع پر بھی گفتگو ہوئی۔ تھامس ایکرٹ نے کہا کہ اقتصادی سفارتکاری امریکی خارجہ پالیسی کا اہم ستون ہے اور معدنیات و توانائی میں شراکت داری خطے میں امن و استحکام کو مضبوط کرے گی۔

وزیر اعلیٰ سہیل آفریدی نے کہا کہ خیبر پختونخوا منرلز ایکٹ کے تحت مقامی آبادی کو سرمایہ کاری میں اوّلین ترجیح دی جائے گی اور نجی سرمایہ کاری کی حوصلہ افزائی کی جائے گی۔ انہوں نے کہا کہ عوامی مفاد صوبائی حکومت کی اولین ترجیح ہے اور سستی و صاف توانائی کے لیے چھوٹے پن بجلی گھروں اور ڈیموں پر کام جاری ہے۔

وزیر اعلیٰ نے مزید کہا کہ نائن الیون کے بعد دہشت گردی کے خلاف جنگ میں خیبر پختونخوا سب سے زیادہ متاثر ہوا، اور اب صوبائی حکومت انفراسٹرکچر، ادارہ جاتی مضبوطی اور مقامی معدنی ذخائر سے براہ راست فوائد دینے پر کام کر رہی ہے۔