لندن میں پاکستان سپر لیگ روڈ شو کرانے کا اعلان

 

 پاکستان کرکٹ بورڈ (پی سی بی) نے اعلان کیا ہے کہ 7 دسمبر کو لندن میں پاکستان سپر لیگ (پی ایس ایل) کا روڈ شو منعقد کیا جائے گا۔ اس ایونٹ میں عالمی سرمایہ کار، کمرشل پارٹنرز اور شائقین کی شرکت متوقع ہے۔

ایچ بی ایل پی ایس ایل کی دو نئی ٹیموں کی فروخت کے لیے تیاریاں تیز ہو گئی ہیں، اور ان میں برطانوی سرمایہ کاروں کی گہری دلچسپی دیکھنے میں آ رہی ہے۔ لندن روڈ شو کا مقصد لیگ کے وژن، کمرشل ماڈل اور مستقبل کی حکمت عملی کو بین الاقوامی سطح پر متعارف کروانا ہے۔ توقع ہے کہ اس موقع پر پاکستان سپر لیگ کی چیمپئن ٹیم لاہور قلندرز کے کپتان شاہین آفریدی اور فاسٹ بولر حارث رؤف بھی شرکت کریں گے۔

پی سی بی کے چیئرمین محسن نقوی نے کہا کہ "لارڈز میں یہ روڈ شو پاکستان کرکٹ کی عالمی شناخت کا ثبوت ہے۔ لندن کا یہ ایونٹ ایچ بی ایل پی ایس ایل کی بین الاقوامی اپیل کو مزید فروغ دے گا۔”

ایچ بی ایل پی ایس ایل کے سی ای او سلمان نصیر نے کہا کہ "پاکستانی لیگ عالمی فالوئنگ اور مضبوط کمرشل ویلیو رکھتی ہے، اور دو نئی ٹیموں کے اضافے سے سرمایہ کاروں کے لیے بڑے مواقع پیدا ہوں گے۔”

اس خصوصی ایونٹ میں 30 سپر فینز کو شرکت کا موقع دیا جائے گا، اور ٹکٹ حاصل کرنے کی تفصیلات جلد جاری کی جائیں گی۔ واضح رہے کہ ایچ بی ایل پی ایس ایل دنیا کی تیزی سے بڑھتی ہوئی ٹی ٹوئنٹی لیگز میں شامل ہے۔