ارشد شریف قتل کیس میں سوموٹو کارروائی کی پیشرفت رپورٹ طلب

 

وفاقی آئینی عدالت نے ارشد شریف قتل کیس میں جاری سوموٹو کارروائی کے دائرہ اختیار سے متعلق قانونی معاونت اور تفتیش میں اب تک کی پیشرفت رپورٹ طلب کر لی ہے۔ عدالت نے استفسار کیا کہ تحقیقات کہاں تک پہنچی ہیں۔

وفاقی آئینی عدالت میں سماعت کے دوران جسٹس عامر فاروق نے کہا کہ یہ بھی واضح کیا جائے کہ قتل کے ذمہ داران کو قانون کے کٹہرے میں لانے کے لیے آئینی طور پر کون سے اقدامات کیے جا سکتے ہیں۔ عدالت نے یہ سوال بھی اٹھایا کہ 27 ویں ترمیم کے بعد آئینی عدالت سوموٹو کارروائی جاری رکھنے کا اختیار رکھتی ہے یا نہیں۔

عدالت نے فریقین کے وکلاء کو ہدایت کی کہ وہ آئندہ سماعت پر اس قانونی نکتے پر معاونت فراہم کریں۔ عدالت نے واضح کیا کہ کارروائی کا مقصد وہی ہونا چاہیے جس کے لیے سوموٹو نوٹس لیا گیا تھا، اور بغیر سماعت کے کوئی کیس نہیں چلایا جا سکتا۔

سماعت کے دوران وکلاء نے مؤقف اختیار کیا کہ عدالتی نظائر موجود ہیں جن کے مطابق آئینی عدالت سوموٹو کارروائی کو آگے بڑھا سکتی ہے۔

عدالت نے قتل کی تحقیقات سے متعلق تازہ پیشرفت رپورٹ طلب کرتے ہوئے کیس کی مزید سماعت 17 دسمبر تک ملتوی کر دی ہے۔