متحدہ عرب امارات سے پاکستان کے لیے کم کرایہ براہِ راست پروازیں شروع

پاکستان کی نجی ائیر لائن ائیر سیال نے اعلان کیا ہے کہ ابوظہبی سے اسلام آباد اور لاہور کے لیے ہفتہ وار براہِ راست پروازیں شروع کر دی جائیں گی۔

گلف نیوز کے مطابق متحدہ عرب امارات میں مقیم پاکستانی اب ائیر سیال کی پروازوں کے ذریعے پاکستان کا سفر نسبتاً کم کرایہ پر کر سکیں گے۔ ائیر سیال ابوظہبی سے لاہور کے لیے ہفتہ وار تین اور اسلام آباد کے لیے ہفتہ وار چار پروازیں آپریٹ کرے گی، جبکہ ابتدائی کرایہ ایک ہزار درہم مقرر کیا گیا ہے۔

ابوظہبی ایئرپورٹس کے مطابق یہ نئی پروازیں پاکستان اور متحدہ عرب امارات کے درمیان مضبوط معاشی اور سماجی تعلقات کی علامت ہیں۔ ائیر سیال کی پہلی پرواز زاید انٹرنیشنل ائیرپورٹ پر پہنچی۔

ابوظہبی ائیرپورٹس کی منیجنگ ڈائریکٹر اور سی ای او ایلینا سورلینی نے کہا کہ ائیر سیال کو خوش آمدید کہتے ہیں، اور یہ نیا روٹ ابوظہبی کے سفر اور تجارتی روابط کو مزید مضبوط کرے گا۔

ائیر سیال کے چیئرمین فضل جیلانی نے کہا کہ براہِ راست پروازوں کا آغاز علاقائی کنیکٹویٹی کے مشن میں ایک اہم سنگ میل ہے۔ انہوں نے مزید کہا کہ یہ نیا روٹ پاکستانی کمیونٹی اور کاروباری سرگرمیوں کے لیے سہل اور اہم رابطہ فراہم کرے گا اور پاکستان و یو اے ای کے دیرینہ تعلقات کو مزید مستحکم کرے گا۔