2025 کا آخری سپر مون آج پاکستان میں کب دکھائی دے گا؟

کراچی: پاکستان اسپیس اینڈ اپر ایٹموسفیئر ریسرچ کمیشن (سپارکو) نے اعلان کیا ہے کہ 2025 کا آخری سپر مون، جسے دسمبر کا کولڈ مون بھی کہا جاتا ہے، آج پاکستان میں نظر آئے گا۔

سپارکو کے مطابق یہ سپر مون 4 اور 5 دسمبر کی رات کو واضح طور پر دیکھا جا سکے گا۔ دسمبر کا کولڈ مون سال 2025 کا تیسرا مسلسل سپر مون ہے، جو 5 دسمبر کی صبح 4:15 بجے 99.8 فیصد روشن حالت میں عروج پر پہنچے گا۔

پاکستان میں چاند 4 دسمبر کی شام 4 بج کر 58 منٹ پر 99.2 فیصد روشن حالت میں طلوع ہوگا۔ سپر مون کے دوران چاند اور زمین کے درمیان فاصلہ تقریباً 357,218 کلومیٹر ہوگا۔

سپارکو کے مطابق سپر مون کے دوران چاند معمول سے تقریباً 7.9 فیصد بڑا اور 15 فیصد زیادہ روشن دکھائی دے گا۔ عالمی سطح پر سپر مون عام طور پر سال میں تین سے چار مرتبہ ہوتا ہے۔