عمران خان نے کبھی فوج کے خلاف بیان نہیں دیا،علی محمد خان

 

اسلام آباد: پاکستان تحریکِ انصاف کے رہنما علی محمد خان نے کہا ہے کہ بانی پی ٹی آئی عمران خان نے کبھی نہیں کہا کہ وہ فوج کے خلاف ہیں۔

نجی ٹی وی کے پروگرام میں علی محمد خان نے بتایا کہ عمران خان کا موقف ہے کہ ملک بھی اُن کا ہے اور فوج بھی اُن کی ہے، صرف یہ کہا جاتا ہے کہ اداروں کا سیاست میں کردار نہیں ہونا چاہیے۔

انہوں نے مزید کہا کہ پاکستان میں دہشت گردی سے بھی بڑا مسئلہ سیاسی عدم استحکام ہے، اور سیاسی استحکام کے بعد معیشت میں بہتری آئے گی۔

دوسری جانب، پی ٹی آئی کے چیئرمین بیرسٹر گوہر نے ڈی جی آئی ایس پی آر کی پریس کانفرنس پر ردعمل میں کہا کہ پریس کانفرنس سے مایوسی ہوئی، بانی پی ٹی آئی اور بشریٰ بی بی جیل میں ہیں، اور ان سے ملاقات کی اجازت ملنے پر معاملات بہتری کی طرف جائیں گے۔

بیرسٹر گوہر نے سوشل میڈیا پر کہا کہ ریاستی ادارے اور سیاسی لوگ ایک دوسرے کو خطرہ یا ذہنی مریض کہہ کر دیکھیں تو یہ افسوسناک ہے۔ انہوں نے واضح کیا کہ ملک کا دفاع اہم ہے اور پی ٹی آئی کا بیانیہ کبھی ملک دشمن نہیں رہا اور نہ ہوگا۔