30 کروڑ روپے فراڈ کا الزام،بھارتی فلمساز وکرم بھٹ اور اہلیہ گرفتار

بھارتی فلم انڈسٹری کے معروف ہدایتکار وکرم بھٹ اور ان کی اہلیہ شویتامبری بھٹ کو راجستھان میں درج بڑے مالیاتی دھوکہ دہی کے مقدمے میں ممبئی سے گرفتار کر لیا گیا۔ اُدے پور پولیس کی خصوصی ٹیم نے جوڑے کو گرفتار کرکے عدالت سے 9 دسمبر تک کا ٹرانزٹ ریمانڈ حاصل کیا ہے۔

مقدمے کے مطابق وکرم بھٹ، ان کی اہلیہ اور چھ دیگر افراد پر الزام ہے کہ انہوں نے اُدے پور کے ڈاکٹر انڈیرا گروپ آف کمپنیز کے بانی اجے مردیا کو تقریباً 30 کروڑ روپے کے مبینہ فراڈ کا نشانہ بنایا۔ شکایت کنندہ کے مطابق رقم بایوپک اور دیگر فلموں کی تیاری کے وعدے کے تحت لی گئی لیکن منصوبے مکمل نہ کیے گئے۔

تفتیش میں معلوم ہوا کہ مبینہ طور پر جعلی وینڈرز کے نام پر فرضی بل اور بڑھا چڑھا کر تیار کی گئی دستاویزات کے ذریعے رقم نکلوائی گئی، جس سے شکایت کنندہ کو 30 کروڑ روپے کا نقصان ہوا۔

عدالت میں پیشی کے دوران وکرم بھٹ کے وکیل نے دعویٰ کیا کہ پولیس نے بغیر مناسب طریقۂ کار کے گرفتاری عمل میں لائی اور ملزمان پر دباؤ ڈال کر دستاویزات پر دستخط کروائے۔ تاہم عدالت نے دونوں فریقین کے دلائل سننے کے بعد وکرم بھٹ اور ان کی اہلیہ کا ٹرانزٹ ریمانڈ 9 دسمبر تک منظور کر لیا۔