بٹگرام:ڈی ایچ کیو اسپتال کے مرکزی گیٹ پر فائرنگ،پولیس کانسٹیبل شہید۔

مانسہرہ(صباح نیوز)ڈسٹرکٹ ہیڈ کوارٹر اسپتال بٹگرام کے مرکزی گیٹ پر نامعلوم افراد کی فائرنگ کے نتیجے میں پولیس کانسٹیبل شہید نامعلوم افراد وقوعہ کے بعد فائرنگ کرتے ہوئے موقع سے فرار ہو گئے۔

تفصیلات کے مطابق کانسٹیبل نیاز محمد شاہ ولد نور حبیب شاہ ڈی ایچ کیو ہسپتال بٹگرام کے مرکزی گیٹ پر اپنی معمول کی ڈیوٹی سرانجام دے رہے تھے کہ علی الصبح تقریباً ساڑھے پانچ بجے نامعلوم افراد نے اچانک فائرنگ کر دی۔ فائرنگ کے نتیجے میں کانسٹیبل نیاز محمد شاہ شدید زخمی ہوگئے۔زخمی اہلکار کو فوری طور پر ڈی ایچ کیو اسپتال بٹگرام منتقل کیا گیا۔ جہاں ابتدائی طبی امداد کی فراہمی کے بعد انتہائی تشویشناک حالت میں ایوب میڈیکل کمپلیکس ایبٹ آباد روانہ کیا گیا۔ مگر وہ راستہ میں ہی زخموں کی تاب نہ لاتے ہوئے شہید ہو گئے ۔

نامعلوم افراد بعد وقوعہ موقع سے فرار ہو گئے۔پولیس نے مقدمہ رجسٹر کرتے ہوئے علاقہ میں نامعلوم افراد کی تلاش کے لئے علاقہ میں سرچ آپریشن شروع کر دیا۔