پنجاب حکومت نے بسنت کے تہوار کی مشروط اجازت دے دی

لاہور: پنجاب حکومت نے فروری میں بسنت کا تہوار منانے کی اجازت دے دی ہے، جس کے تحت 6، 7 اور 8 فروری کو یہ تہوار منایا جائے گا۔ ذرائع کے مطابق اس دوران کسی کو قواعد و ضوابط کی خلاف ورزی کی اجازت نہیں ہوگی اور پتنگوں اور ڈور کے لیے خصوصی کیو آر کوڈ جاری کیے جائیں گے۔

ذرائع نے بتایا کہ بسنت کے موقع پر فائرنگ یا ہلڑ بازی کی سختی سے ممانعت ہوگی۔ اس سے قبل گورنر پنجاب سلیم حیدر کے دستخطوں سے بسنت منانے کی مشروط اجازت کا آرڈیننس جاری کیا گیا تھا، جس میں خلاف ورزی پر قید اور جرمانے کی سزائیں مقرر کی گئی ہیں۔

آرڈیننس کے مطابق پنجاب میں 2001 سے پتنگ بازی پر پابندی تھی، جس کے 25 سال بعد دوبارہ اجازت دی گئی ہے۔ تاہم 18 سال سے کم عمر بچے پتنگ بازی نہیں کر سکیں گے اور خلاف ورزی کی صورت میں والد یا سرپرست ذمہ دار ہوگا۔

بسنت کے دوران صرف دھاگے سے بنی ڈور استعمال کرنے کی اجازت ہوگی، دھاتی یا تیز دھار مانجھے کے استعمال پر کم از کم 3 سال اور زیادہ سے زیادہ 5 سال قید اور 20 لاکھ روپے جرمانے کی سزا ہو سکتی ہے۔ ضلع کے اندر ہر موٹر سائیکل متعین کردہ حفاظتی تدابیر کے مطابق چلائی جائے گی۔