میانمار:رخائن کے اسپتال پر فضائی حملہ،31 ہلاک اور 68 زخمی

میانمار کی فوج نے اپنی ریاست رخائن کے شہر مروک اُو میں ایک اسپتال پر فضائی حملہ کیا، جس کے نتیجے میں کم از کم 31 افراد ہلاک اور 68 زخمی ہو گئے ہیں۔ زخمی افراد اسپتال میں زیر علاج ہیں اور ہلاکتوں میں اضافے کا خدشہ بھی ظاہر کیا جا رہا ہے۔

غیر ملکی خبر رساں ادارے کے مطابق ریسکیو اہلکاروں نے بتایا کہ حملہ رات کے اوقات میں کیا گیا۔ فوج کی جانب سے 28 دسمبر کو انتخابات کے آغاز کا اعلان کیا گیا ہے، تاہم جمہوریت کے حامی اور باغی گروہ اس عمل کا بائیکاٹ کر رہے ہیں۔

واضح رہے کہ 2021 میں میانمار میں فوج نے بغاوت کے ذریعے اقتدار پر قبضہ کر لیا تھا، اور اس کے بعد سے ملک شدید خانہ جنگی کا شکار ہے۔ فوج کی جانب سے مختلف گروہوں کے خلاف فضائی کارروائیوں میں شہری ہلاکتیں معمول بن چکی ہیں، جس سے انسانی حقوق کی سنگین خلاف ورزیاں سامنے آ رہی ہیں۔