انڈر 19 ایشیا کپ: سمیر منہاس، احمد حسین کی سنچریاں، پاکستان کی 297 رنز سے فتح

دبئی: انڈر 19 ایشیا کپ میں پاکستان نے ملائیشیا کو 297 رنز سے شکست دے کر فاتحانہ آغاز کردیا۔

دبئی میں کھیلے گروپ اے کے میچ میں ملائیشین ٹیم 346 رنز کے ہدف کے تعاقب میں صرف 48 رنز پر ڈھیر ہوگئی۔

ملائیشیا کا کوئی بھی کھلاڑی ڈبل فیگرز میں داخل نہ ہوسکا۔ کپتان ڈیاز پیٹرو اور محمد اکرم 9،9 رنز بناکر ٹاپ اسکورر رہے۔

پاکستان کی جانب سے علی رضا اور محمد صیام نے 3،3، دانیال علی خان نے 2 اور نقاب شفیق نے ایک وکٹ حاصل کی۔

اس سے قبل انڈر 19 ایشیا کپ میں گروپ اے کے میچ میں پاکستان نے ملائیشیا کو جیتنے کیلئے 346 رنز کا ٹارگٹ  دیا تھا۔

ایشیا کپ کے میچ میں دبئی میں ملائیشیا نے ٹاس جیتا اور پاکستان کو پہلے بیٹنگ کرنے کی دعوت دی، پاکستان کی جانب سے عثمان خان اور سمیر منہاس نے اننگز کا آغاز کیا۔

عثمان خان ایک رنز بنا کر آؤٹ ہو گئے، ان کے بعد آنے والے علی حسن بلوچ بھی 14 رنز بنا کر پویلین لوٹ گئے۔ ان کے آؤٹ ہونے کے بعد احمد حسین بیٹنگ کے لئے آئے۔

سمیر منہاس اور احمد حسین نے تیسری وکٹ پر 293 رنز کی شراکت قائم کی، احمد حسین نے شاندار 132 رنز بنائے، ان اس اننگز میں دو چھکے اور آٹھ چوکے شامل تھے۔

سمیر منہاس نے آٹھ چھکوں اور 11 چوکوں کی مدد سے 177 رنز بنائے اور ناٹ آؤٹ رہے، فرحان یوسف بھی آٹھ رنز بنا کر ناٹ آؤٹ رہے۔

پاکستان نے مقررہ پچاس اوورز میں تین وکٹوں کے نقصان پر 345 رنز بنائے اور ملائیشیا کو جیتنے کے لئے 346 رنز کا ہدف دیا۔