سڈنی فائرنگ کے بعد ایشیز سیریز کے تیسرے ٹیسٹ میں سکیورٹی میں اضافہ

 

آسٹریلیا کے شہر سڈنی میں پیش آنے والے فائرنگ کے واقعے کے بعد ایشیز سیریز کے تیسرے ایڈیلیڈ ٹیسٹ میں سکیورٹی بڑھانے کا فیصلہ کیا گیا ہے۔

آسٹریلوی میڈیا کے مطابق حکام نے ایڈیلیڈ اوول کے باہر اضافی سکیورٹی تعینات کرنے کی تصدیق کی ہے۔ ساؤتھ آسٹریلیا پولیس کمشنر گرانٹ اسٹیونز نے کہا کہ سکیورٹی رسپانس سیکشن کو تعینات کیا جا رہا ہے، جس میں پولیس افسران اعلیٰ تربیت یافتہ اور اضافی اسلحہ سے لیس ہوں گے۔

کمشنر کے مطابق رسپانس سیکشن چند سال قبل قائم کیا گیا تھا اور یہ پبلک مقامات پر فرائض انجام دیتا ہے۔ اب اسے اسٹیڈیم کے ارد گرد تعینات کیا جائے گا تاکہ فینز کی حفاظت کو یقینی بنایا جا سکے۔

واضح رہے کہ سڈنی کے ساحل پر ہونے والے فائرنگ کے واقعے میں اب تک 15 افراد ہلاک ہو چکے ہیں۔ آسٹریلیا اور انگلینڈ کے درمیان ایشیز سیریز کا تیسرا ٹیسٹ 17 دسمبر سے ایڈیلیڈ اوول میں شروع ہوگا۔