سیلفی کے بہانے فائرنگ سے مشہور کبڈی کھلاڑی قتل

بھارتی ریاست پنجاب کے شہر موہالی میں ایک دلخراش واقعے میں نامعلوم مسلح افراد نے سیلفی کے بہانے فائرنگ کر کے مشہور کبڈی کھلاڑی رانا بالاچوریا کو قتل کر دیا۔

پولیس کے مطابق گزشتہ روز موٹر سائیکل پر سوار دو سے تین افراد کبڈی گراؤنڈ میں داخل ہوئے اور کھلاڑیوں کے قریب جا کر تصویر بنانے کا بہانہ کیا، اسی دوران انہوں نے رانا بالاچوریا پر اندھا دھند فائرنگ کی۔ فائرنگ کے نتیجے میں رانا کے چہرے اور جسم کے اوپری حصے پر چار سے پانچ گولیاں لگیں، جس کے بعد انہیں شدید زخمی حالت میں اسپتال منتقل کیا گیا، تاہم وہ زخموں کی تاب نہ لاتے ہوئے جاں بحق ہو گئے۔

پولیس نے علاقے کو گھیرے میں لے کر شواہد اکٹھے کر لیے ہیں اور واقعے کی مختلف پہلوؤں سے تحقیقات جاری ہیں۔ ابتدائی تحقیقات کے مطابق حملہ گینگ وار کے تناظر میں بھی دیکھا جا رہا ہے۔

دریں اثنا، بدنام زمانہ بمبیہا گینگ نے سوشل میڈیا پر جاری بیان میں اس قتل کی ذمہ داری قبول کر لی ہے۔ گینگ کے مطابق رانا بالاچوریا نے پنجابی گلوکار سدھو موسے والا کے قاتلوں کو پناہ دی تھی اور مقتول کا تعلق مبینہ طور پر جگو بھگوان پوریا اور لارنس بشنوئی کے مخالف گروہوں سے تھا۔