برطانیہ نے افغانستان کا سفر نہ کرنے کی سخت وارننگ جاری کر دی

برطانوی حکومت نے افغانستان میں خراب سکیورٹی صورتحال کے پیشِ نظر اپنے شہریوں کو سخت وارننگ جاری کر دی ہے۔

برطانوی دفتر خارجہ نے تازہ ٹریول ایڈوائزری میں خبردار کیا ہے کہ افغانستان میں پرتشدد واقعات میں مسلسل اضافہ ہو رہا ہے اور ملک بھر میں سیکیورٹی خطرات بدستور موجود ہیں۔ سرحدی راستوں کی بندش، محدود نقل و حرکت اور سفارتی سہولتوں کی عدم دستیابی کے باعث افغانستان کا سفر انتہائی خطرناک ہو چکا ہے۔

ایڈوائزری میں کہا گیا ہے کہ افغانستان میں موجود برطانوی شہری گرفتاری، حراست اور طویل قید کا سامنا کر سکتے ہیں۔ اسی لیے برطانوی شہریوں کو فوری طور پر ملک چھوڑنے کی ہدایت بھی جاری کی گئی ہے۔

مغربی حکام کے مطابق طالبان حکومت کے قیام کے بعد افغانستان میں دہشت گردی کے خدشات، عدم استحکام اور سیکیورٹی مسائل میں اضافہ ہوا ہے، جس کے باعث عالمی سطح پر تشویش پائی جا رہی ہے۔