پاکستانی کھلاڑی بگ بیش لیگ میں پورا سیزن کھیلیں گے،ٹوڈ گرین برگ

میلبرن: کرکٹ آسٹریلیا کے چیف ایگزیکٹو ٹوڈ گرین برگ نے تصدیق کی ہے کہ پاکستانی کھلاڑی بگ بیش لیگ (بی بی ایل) میں پورا سیزن کھیلیں گے۔

ٹوڈ گرین برگ نے کہا کہ جن کھلاڑیوں کے معاہدے ہوئے ہیں وہ مکمل سیزن کھیلیں گے اور ٹی 20 سیریز کے لیے پاکستان کا دورہ شیڈول کے مطابق ہوگا۔ دورے کی تاریخوں کا اعلان جلد کیا جائے گا اور ایشیز سیریز کے بعد کھلاڑیوں سے بات چیت کی جائے گی۔

انہوں نے مزید کہا کہ کھلاڑیوں کو سکیورٹی کے تمام معاملات سے آگاہ کیا جائے گا، اور 2022 میں پاکستان کا دورہ ایک مثبت تجربہ رہا تھا۔ واضح رہے کہ پاکستان ٹیم کے جنوری میں سری لنکا کے دورے کی وجہ سے بی بی ایل کے پورے سیزن میں شامل ہونے پر خدشات پیدا ہوئے تھے، تاہم اب کھلاڑی پورا سیزن کھیلیں گے۔