پاکستانی کھلاڑی عبیداللہ بھارتی جھنڈا اٹھا کر میدان میں اتر گیا

پاکستانی کبڈی کھلاڑی عبیداللہ کے بھارتی ٹیم کی جانب سے کھیلنے اور بھارتی جھنڈا لہرانے کے معاملے پر پاکستان کبڈی فیڈریشن نے سخت ایکشن لینے کا اعلان کر دیا ہے۔ فیڈریشن کی جنرل کونسل نے اس حوالے سے ہنگامی اجلاس طلب کیا ہے۔

فیڈریشن سیکرٹری رانا سرور کے مطابق چیئرمین چوہدری شافع حسین نے 27 دسمبر کو اجلاس بلایا ہے۔ انہوں نے کہا کہ بحرین میں ہونے والے ٹورنامنٹ میں پاکستان کے 16 کھلاڑیوں نے شرکت کی، لیکن یہ قومی ٹیم نہیں تھی اور نہ ہی اس کی اجازت فیڈریشن سے لی گئی تھی، نہ ہی کسی کھلاڑی کو این او سی جاری کیا گیا۔

رانا سرور نے کہا کہ یہ ایک خود ساختہ ٹیم تھی جس نے پاکستان کا نام استعمال کیا، اور اس غیر قانونی ایونٹ میں حکومت یا فیڈریشن کو اطلاع نہیں دی گئی۔ انہوں نے واضح کیا کہ قومی کھلاڑی کا بھارتی ٹیم کے ساتھ کھیلنا اور جھنڈا لہرانا ناقابل برداشت ہے، اور معاملے کی تحقیقات کے بعد سخت ترین کارروائی کی جائے گی۔

فیڈریشن نے خود ساختہ پروموٹرز کے خلاف بھی ایکشن لینے کا عندیہ دیا اور کہا کہ کسی صورت میں پاکستان کے نام کو بدنام کرنے کی اجازت نہیں دی جائے گی۔ رانا سرور نے مزید کہا کہ کلب لیول پر مختلف ممالک کے کھلاڑی ایک ساتھ کھیل سکتے ہیں، لیکن غیر ملکی ٹیم کی جانب سے کھیلنا اور جھنڈا لہرانا افسوسناک ہے۔