آسام:راجدھانی ایکسپریس سے ٹکرانے پر 8 ہاتھی ہلاک، بچہ زخمی

بھارتی ریاست آسام میں راجدھانی ایکسپریس ایک ہاتھیوں کے جھنڈ سے ٹکرا گئی، جس کے نتیجے میں کم از کم آٹھ ہاتھی ہلاک اور ایک بچہ زخمی ہو گیا۔

حادثہ گزشتہ رات تقریباً 2 بج کر 17 منٹ پر ہوجائی علاقے میں پیش آیا، جب ٹرین ہاتھیوں کے جھنڈ کے سامنے تیز رفتاری سے گزر رہی تھی۔ پائلٹ نے ہاتھیوں کو بچانے کے لیے ایمرجنسی بریک لگائی، لیکن ٹرین ہاتھیوں سے ٹکرا گئی جس کے نتیجے میں انجن اور پانچ بوگیاں پٹری سے اتر گئیں۔

بھارتی جنگلاتی محکمے کے افسران کے مطابق حادثے میں آٹھ ہاتھی ہلاک ہوئے جبکہ ایک ہاتھی کا بچہ زخمی ہونے کے بعد محفوظ رہا۔ حادثے کے سبب ٹرین سروس بھی متاثر ہوئی ہے، تاہم کسی مسافر کے زخمی ہونے کی اطلاع نہیں ہے۔