بغیر محرم مارکیٹ آنیوالی خواتین کے داخلے پرطالبان کی پابندی

افغانستان میں طالبان حکومت نے شمالی صوبے بلخ کے حیرتان سرحدی علاقے میں ازبکستان کے ساتھ قائم مشترکہ مارکیٹ میں خواتین کے داخلے پر پابندی لگا دی ہے اگر وہ اپنے محرم کے بغیر آئیں۔

مقامی میڈیا کے مطابق طالبان اہلکار مارکیٹ کی سیکیورٹی پر مامور ہیں اور وہ خواتین کو بغیر مرد سرپرست کے داخل ہونے سے روک رہے ہیں۔ جن خواتین کے ساتھ مرد ہیں، ان سے محرم رشتہ ثابت کرنے کے لیے دستاویزات مانگی جا رہی ہیں۔ اگر مرد کے پاس دستاویزی ثبوت نہ ہو تو انہیں بھی مارکیٹ میں داخل ہونے کی اجازت نہیں دی جاتی۔

عینی شاہدین کا کہنا ہے کہ بعض اوقات طالبان اہلکار مردوں کے ساتھ سخت اور توہین آمیز رویہ اختیار کرتے ہیں، جس سے سرحدی مارکیٹ میں جانے والے افراد پر دباؤ بڑھ جاتا ہے۔

مقامی شہریوں نے بتایا کہ مارکیٹ میں آنے والی خواتین میں بڑی تعداد عمر رسیدہ ہے، جو ازبکستان اور روس سے علاج کے لیے آتی ہیں۔ طالبان حکام نے اس پابندی کے حوالے سے ابھی تک کوئی رسمی بیان جاری نہیں کیا۔