چین،بغیر نکاح رہائش اور غیر شادی شدہ حمل پر بھاری جرمانے عائد

بیجنگ: چین کے شہر لنکانگ کے ایک گاؤں نے غیر صوبائی شادی، بغیر نکاح ساتھ رہنے اور غیر شادی شدہ حمل پر بھاری جرمانے عائد کر دیے ہیں، جس پر عوامی ردِعمل سامنے آیا ہے۔

ساؤتھ چائنہ مارننگ پوسٹ کے مطابق گاؤں کی انتظامیہ نے ایک نوٹس جاری کیا، جس میں کہا گیا کہ اگر کوئی شخص صوبے سے باہر شادی کرتا ہے تو اسے 1500 یوان (تقریباً 60 ہزار روپے) جرمانہ ادا کرنا ہوگا۔ بغیر نکاح حاملہ ہونے پر جرمانہ 3000 یوان (تقریباً ایک لاکھ 20 ہزار روپے) مقرر کیا گیا ہے۔

نوٹس میں مزید کہا گیا کہ بغیر نکاح ساتھ رہنے والے جوڑوں کو ہر سال 500 یوان ادا کرنا ہوں گے، جبکہ اگر شادی کے بعد 10 ماہ سے پہلے بچہ پیدا ہوتا ہے تو بھی 3000 یوان جرمانہ ہوگا۔

اس فیصلے پر سوشل میڈیا پر شدید تنقید ہوئی اور اسے غیر منصفانہ اور غیر قانونی قرار دیا جا رہا ہے، جس سے عوام میں سخت ناراضگی پائی جاتی ہے۔