یورپ میں پاکستانی ورک فورس کے لیے روزگار کے دروازے کھل گئے

اسلام آباد: پاکستانی ورک فورس کے لیے یورپ میں روزگار کے دروازے کھل گئے ہیں۔ وزارت اوورسیز پاکستانیز کی کوششوں کے نتیجے میں اٹلی نے اگلے تین سال کے لیے پاکستان کو 10,500 نوکریوں کا کوٹہ مختص کر دیا ہے۔

وفاقی وزیر چوہدری سالک حسین نے اس موقع پر کہا کہ یہ ایک اہم سنگ میل ہے اور توقع ہے کہ جلد یورپ کے دیگر ممالک میں بھی پاکستانیوں کے لیے ملازمتوں کے مواقع بڑھیں گے۔ وزارت اوورسیز پاکستانیز اور حکومت کی مسلسل کوششوں کے بعد اگلے تین سال کے دوران ہر سال 3,500 پاکستانی سیزنل اور نان سیزنل ملازمتوں کے لیے اٹلی جائیں گے۔

پاکستانیوں کے لیے مختص کوٹہ میں شپ بریکنگ، ہاسپیٹلیٹی، ہیلتھ کیئر اور زراعت کے شعبے شامل ہیں، جہاں ماہر پاکستانی اپنے کیریئر کے مواقع حاصل کر سکیں گے۔

وفاقی وزیر نے کہا کہ یہ اقدام نہ صرف پاکستانی مہاجرین کے لیے روزگار کے مواقع فراہم کرے گا بلکہ ملکی معیشت کے لیے بھی مفید ثابت ہوگا۔ انہوں نے مزید کہا کہ جلد یورپ کے دیگر ممالک بھی پاکستانی ورک فورس کے لیے ملازمتوں کے مواقع فراہم کریں گے، جس سے بین الاقوامی سطح پر پاکستان کی محنت کش برادری کے لیے نئے دروازے کھلیں گے۔