وائٹ ہاؤس کوپاکستان نے کیسے اپنا ہم نوا بنایا؟

اسلام آباد: ماہرین کے مطابق پاکستان نے وائٹ ہاؤس کے ساتھ تعلقات مضبوط کرنے میں اہم کردار ادا کیا ہے، جس کی وجہ کابل ائیرپورٹ حملے کے مرکزی ملزم محمد شریف اللّٰہ کی گرفتاری اور امریکہ کے حوالے کرنا ہے۔ اس اقدام سے واشنگٹن کے ساتھ تعلقات میں نمایاں بہتری آئی۔

صدر ڈونلڈ ٹرمپ نے کانگریس سے خطاب میں پاکستان کا شکریہ ادا کیا اور اسے اہم سفارتی پیشرفت قرار دیا۔ ماہرین کے مطابق یہی واقعہ ٹرمپ انتظامیہ اور پاکستان کے تعلقات میں فیصلہ کن موڑ ثابت ہوا۔

کشمیر بحران کے دوران بھارت نے امریکی ثالثی مسترد کی، جبکہ پاکستان نے سفارتی راستہ اختیار کیا اور واشنگٹن میں مؤثر لابنگ کے ذریعے ٹرمپ کے قریبی مشیروں سے تعلقات قائم کیے۔ جنرل عاصم منیر کے وائٹ ہاؤس دورے کو غیر معمولی اہمیت دی گئی اور ٹرمپ نے اسے سراہا۔ پاکستان نے خود کو مشرق وسطیٰ میں ایک اہم شراکت دار کے طور پر پیش کیا، خاص طور پر خلیجی ممالک اور سعودی عرب کے ساتھ تعلقات کی بنیاد پر۔

امریکہ کے ساتھ 6 ٹریلین ڈالر مالیت کے معدنی وسائل کے معاہدے نے بھی پاکستان کی اہمیت بڑھائی۔ ماہرین کا کہنا ہے کہ اگرچہ یہ پاکستان کی بڑی سفارتی کامیابی ہے، کمزور معیشت اور علاقائی عدم استحکام مستقبل میں چیلنجز بن سکتے ہیں۔