طالبان انٹیلی جنس چیف کا معاون دھماکے میں جاں بحق

کابل:  افغان طالبان کی انٹیلی جنس ایجنسی کے سربراہ عبد الحق واثق کے معاون کابل میں ہونے والے ایک دھماکے میں ہلاک جاں بحق  ہو گئے ہیں۔

افغان میڈیا نے مقامی ذرائع کا حوالہ دیتے ہوئے کہا ہے کہ  جاںبحق ہونے والے شخص کی شناخت مولوی نعمان کے نام سے ہوئی ہے۔

رپورٹس کے مطابق یہ واقعہ جمعے کے روز کابل کے علاقے بوٹخاک میں مولوی نعمان کے گھر کے اندر پیش آیا، دھماکے کے نتیجے میں مولوی نعمان موقع پر ہی جاں بحق ہو گئے جبکہ ان کا بیٹا زخمی ہوا۔

طالبان کے قریبی ذرائع نے ابتدائی طور پر کہا تھا کہ مولوی نعمان کی موت اس وقت ہوئی جب ان کے گھر میں گیس سلنڈر پھٹ گیا۔ تاہم رہائش گاہ کے قریب رہنے والے ایک عینی شاہد نے بتایا کہ گھر کی دوسری منزل کا ایک کمرہ جہاں اس وقت نعمان اور ایک مہمان موجود تھے مکمل طور پر تباہ ہو گیا تھا۔

افغان میڈیا کا کہنا ہے کہ طالبان حکام نے تاحال واقعے پر کوئی باضابطہ بیان جاری نہیں کیا اور نہ ہی دھماکے کی وجہ واضح کی گئی ہےتاہم  شبہ ہے کہ دھماکہ گیس سلنڈر میں نصب بارودی مواد کے پھٹنے سے ہوا۔