پی ایس ایل 11: وسیم اکرم برانڈ ایمبیسڈر مقرر

پاکستان کرکٹ بورڈ (پی سی بی) نے قومی کرکٹ ٹیم کے سابق کپتان وسیم اکرم کو پاکستان سپر لیگ کا برانڈ ایمبیسڈر مقرر کردیا۔

چیئرمین پی سی بی محسن نقوی نے لاہور میں پریس کانفرنس کرتے ہوئے کہاکہ پی ایس ایل 11 کا آغاز 26 مارچ کے بجائے 23 مارچ سے کرنے کا سوچ رہے ہیں، تاہم ابھی تک اس حوالے سے کوئی حتمی فیصلہ نہیں کیا گیا۔

محسن نقوی نے کہا کہ ملتان سلطانز کو اس سال پی سی بی خود آپریٹ کرے گا، ملتان سلطانز کی نیلامی پی ایس ایل ختم ہونے کے بعد کی جائےگی، ہم ملک میں کرکٹ کی بہتری کے لیے کوشاں ہیں۔

انہوں نے کہا کہ پی ایس ایل ٹیموں کی بڈنگ 8 جنوری کو اسلام آباد میں ہوگی، تمام فرنچائز کی مشاورت سے پی ایس ایل کا آغاز 23 مارچ سے کرنے کا فیصلہ کریں گے۔

ان کا کہنا تھا کہ جنوری ہمارے لیے اہم ہے، ہماری ٹیمیں اچھی فروخت ہوں گی، نیوز چینل کو سپورٹس ایونٹ کی کوریج کے لیے وزیر اطلاعات سے درخواست کروں گا، کرکٹ اکیڈمی کو  ریجن کی بہترین اکیڈمی بنانےکا ہدف ہے، پاکستان شاہینز کو بھی ہم بہت مضبوط بنانا چاہتے ہیں۔

محسن نقوی کا کہنا تھا کہ  ریڈ بال کے کوچ کا ابھی فیصلہ ہونا باقی ہے، ٹیم اس پر کام کر رہی ہے،  آسٹریلیا کے خلاف ہوم سیریز کے اب تک تین ہی ٹی ٹوئنٹی شیڈولڈ ہیں۔

محسن نقوی نےکہا ہےکہ  بھارت کے ساتھ  جو  بھی ہوگا وہ  برابری کی سطح  پر  ہوگا، بھارتی  ہینڈ  شیک  نہیں کرنا  چاہتے تو  ہمیں  بھی کوئی شوق نہیں۔لاہور میں پریس کانفرنس کرتے ہوئے محسن نقوی کا کہنا تھا کہ  بھارتی انڈر 19 ٹیم کے رویے پر آئی سی سی سے بات ہوگی، آئی سی سی کو  بھارتی رویے  پر لکھ  رہے ہیں۔