پاکستانی کپتان شان مسعود نے نیا ریکارڈ بنا ڈالا

پاکستانی ٹیسٹ ٹیم کے کپتان شان مسعود نے شاندار بیٹنگ کا مظاہرہ کرتے ہوئے نیا قومی ریکارڈ قائم کر دیا ہے۔ 36 سالہ شان مسعود نے کراچی میں جاری پریزیڈنٹ ٹرافی کے پہلے روز برق رفتار ڈبل سنچری اسکور کی۔

ایس این جی پی ایل کی نمائندگی کرتے ہوئے شان مسعود نے ساحر ایسوسی ایٹس کے خلاف 177 گیندوں پر ڈبل سنچری مکمل کی، جو پاکستان کی تاریخ کی تیز ترین فرسٹ کلاس ڈبل سنچری ہے۔ اس سے قبل یہ ریکارڈ انضمام الحق کے پاس تھا، جنہوں نے 1992 میں آکسفورڈ اینڈ کیمبرج یونیورسٹی کے خلاف ٹور میچ میں 188 گیندوں پر ڈبل سنچری بنائی تھی۔

شان مسعود کی یہ اننگز پاکستانی سرزمین پر بھی تیز ترین فرسٹ کلاس ڈبل سنچری قرار پائی ہے۔ وہ پہلے دن کے اختتام پر 185 گیندوں پر 212 رنز بنا کر ناٹ آؤٹ رہے۔

واضح رہے کہ اس سے قبل پاکستان میں تیز ترین ڈبل سنچری کا اعزاز بھارتی بلے باز وریندر سہواگ کے پاس تھا، جنہوں نے 2006 میں لاہور ٹیسٹ کے دوران 182 گیندوں پر ڈبل سنچری اسکور کی تھی۔