متحدہ عرب امارات:گرد و غبار کے خدشے پر ییلو الرٹ جاری

متحدہ عرب امارات میں نیشنل سینٹر آف میٹرولوجی (این سی ایم) نے گرد و غبار کے طوفان کے خدشے کے پیش نظر ییلو الرٹ جاری کر دیا ہے۔ این سی ایم نے عوام، خاص طور پر گاڑی چلانے والوں، کو محتاط رہنے کی ہدایات جاری کی ہیں۔

محکمہ موسمیات کے مطابق تیز ہوائیں حدِ نگاہ متاثر کر سکتی ہیں، جس کے باعث ڈرائیونگ کے دوران خطرناک صورتحال پیدا ہو سکتی ہے۔ شہریوں سے اپیل کی گئی ہے کہ غیر ضروری طور پر باہر نکلنے سے گریز کریں اور گھروں و عمارتوں کے دروازے اور کھڑکیاں بند رکھیں۔

این سی ایم نے شہریوں کو ہدایت دی ہے کہ موسم سے متعلق تازہ ترین معلومات صرف سرکاری ذرائع سے حاصل کریں۔ علاوہ ازیں سمندر کے کنارے جانے والوں کو بھی خبردار کیا گیا ہے، کیونکہ بحیرہ عمان میں طغیانی کے شدید امکانات موجود ہیں۔