دنیا کا سب سے موٹا شخص انتقال کرگیا

لندن: دنیا کے سب سے وزنی شخص قرار دیے جانے والے جوآن پیڈرو فرانکو 41 سال کی عمر میں گردوں کے شدید انفیکشن کے باعث انتقال کر گئے۔

غیر ملکی میڈیا رپورٹس کے مطابق جوآن پیڈرو فرانکو کا تعلق میکسیکو سے تھا اور وہ گزشتہ کئی روز سے اسپتال میں زیر علاج تھے، جہاں وہ شدید انفیکشن میں مبتلا تھے۔ رپورٹس کے مطابق وقت گزرنے کے ساتھ ان کی صحت مزید بگڑتی چلی گئی اور وہ جانبر نہ ہو سکے۔

گنیز ورلڈ ریکارڈ کے مطابق جوآن پیڈرو فرانکو کو سال 2017 میں 1,322 پاؤنڈ، یعنی تقریباً 600 کلوگرام وزن کے ساتھ دنیا کا سب سے موٹا زندہ انسان قرار دیا گیا تھا۔ وہ طویل عرصے تک بستر تک محدود رہے اور روزمرہ زندگی کے معمولات انجام دینے میں شدید مشکلات کا سامنا تھا۔

میڈیا رپورٹس کے مطابق مشکلات کے باعث جوآن پیڈرو فرانکو نے وزن کم کرنے کا فیصلہ کیا اور سرجری اور ڈائٹنگ کے ذریعے وزن میں نمایاں کمی لانے میں کامیاب ہوئے۔ بتایا گیا ہے کہ انہوں نے اپنے وزن کو 600 کلوگرام سے کم کر کے تقریباً 590 کلوگرام تک پہنچا دیا تھا۔

بدقسمتی سے گردوں کے شدید انفیکشن کے باعث ان کی زندگی کا خاتمہ ہو گیا، جس پر دنیا بھر میں افسوس کا اظہار کیا جا رہا ہے۔