امریکی صدر کا ایران میں مظاہرین کی حمایت کا عندیہ

امریکی صدر ڈونلڈ ٹرمپ نے ایران میں مظاہرین کی مدد کے لیے ممکنہ مداخلت کا عندیہ دے دیا ہے۔ ان کا کہنا ہے کہ ایرانی حکومت پرامن مظاہرین کے خلاف طاقت کا استعمال کر رہی ہے اور فائرنگ کے واقعات میں قیمتی جانیں ضائع ہو رہی ہیں۔ اگر یہ صورتحال برقرار رہی تو امریکا مظاہرین کی حمایت میں عملی قدم اٹھا سکتا ہے، ہم ہر قسم کی کارروائی کے لیے تیار ہیں۔

ایران میں مہنگائی کے خلاف احتجاجی مظاہرے چھٹے روز میں داخل ہو چکے ہیں۔ تہران سمیت مختلف شہروں میں پرتشدد مظاہروں کی اطلاعات ہیں۔ لُرستان صوبے میں مظاہرین نے ایک پولیس اسٹیشن پر دھاوا بول دیا، پولیس پر پتھراؤ کیا گیا اور کئی گاڑیوں کو آگ لگا دی گئی۔

پولیس کی فائرنگ کے نتیجے میں 6 افراد جاں بحق اور 17 زخمی ہو گئے، جبکہ درجنوں مظاہرین کو حراست میں لے لیا گیا۔ ایرانی حکام کے مطابق کوہ دشت کے علاقے میں ایک سیکیورٹی اہلکار بھی مظاہرین کے تشدد سے ہلاک ہوا، جس کے بعد کشیدگی میں مزید اضافہ ہو گیا۔

مہنگائی کے خلاف احتجاج کا آغاز اتوار کو ہوا تھا، بعد ازاں منگل کے روز ایران کی 10 جامعات کے طلبا نے بھی احتجاج میں شامل ہونے کا اعلان کیا۔ غیر ملکی میڈیا کے مطابق معاشی بحران کے باعث ایران میں مہنگائی کی شرح 52 فیصد تک پہنچ چکی ہے۔