یمن:سعودی قیادت میں فضائی کارروائیاں، 7 علیحدگی پسند جنگجو ہلاک

یمن میں سعودی عرب کی قیادت میں قائم اتحاد کی جانب سے کیے گئے فضائی حملوں میں علیحدگی پسند سدرن ٹرانزیشن کونسل (ایس ٹی سی) کے کم از کم سات جنگجو مارے گئے ہیں۔

میڈیا رپورٹس کے مطابق ایس ٹی سی کے ایک سینئر عہدیدار نے تصدیق کی ہے کہ یہ حملے آج کیے گئے، جو گزشتہ ماہ حضرموت اور المہرہ کے وسیع علاقوں پر ایس ٹی سی کے کنٹرول کے بعد اتحادی افواج کی پہلی بڑی فضائی کارروائی ہے جس میں جانی نقصان سامنے آیا ہے۔

بین الاقوامی خبر رساں ایجنسی کے مطابق عینی شاہدین کا کہنا ہے کہ حضرموت کے شہر سیئون میں واقع ہوائی اڈے اور ایک فوجی تنصیب کو بھی نشانہ بنایا گیا۔ ابتدائی حملوں میں وادی حضرموت اور صحرائے حضرموت کے علاقے میں واقع الخشعہ کیمپ پر بمباری کی گئی، جہاں سات افراد ہلاک جبکہ بیس سے زائد زخمی ہوئے۔

ایس ٹی سی کے مقامی سربراہ محمد عبد المالک کے مطابق یہ حملے غیر متوقع تھے اور نقصانات کا حتمی تخمینہ لگایا جا رہا ہے۔

دوسری جانب حضرموت کے سعودی حمایت یافتہ گورنر سالم الخنباشی نے دعویٰ کیا ہے کہ ان کی فورسز نے علاقے کے سب سے بڑے فوجی اڈے الخشعہ پر قبضہ حاصل کر لیا ہے اور اب سیئون کی جانب پیش قدمی جاری ہے۔ انہوں نے خون خرابے سے بچنے کے لیے ایس ٹی سی کے جنگجوؤں سے علاقے خالی کرنے کی اپیل بھی کی ہے۔