تیمور ویپن سسٹم کے کامیاب تجربے پرصدر اور وزیراعظم کی قوم کو مبارکباد

اسلام آباد: صدر مملکت آصف علی زرداری اور وزیراعظم محمد شہباز شریف نے پاک فضائیہ کی جانب سے مقامی طور پر تیار کردہ تیمور ویپن سسٹم کے کامیاب تجربے پر قوم اور پاکستان ایئر فورس کو مبارکباد دی ہے۔

صدر آصف علی زرداری نے پاک فضائیہ کو خراجِ تحسین پیش کرتے ہوئے کہا کہ مقامی سطح پر جدید دفاعی نظام کی تیاری قومی صلاحیت، ادارہ جاتی مہارت اور مضبوط عزم کی واضح مثال ہے۔ انہوں نے کہا کہ اس کامیابی سے پاکستان کا دفاع مزید مضبوط ہوا ہے اور خطے میں امن و استحکام کے لیے پاکستان کی ذمہ دارانہ دفاعی پالیسی کو تقویت ملی ہے۔

صدر مملکت نے سائنسدانوں، انجینئرز اور پاک فضائیہ کے افسران و جوانوں کی محنت اور پیشہ ورانہ صلاحیتوں کو سراہتے ہوئے کہا کہ دفاعی شعبے میں خود انحصاری پاکستان کی سلامتی اور خودمختاری کے تحفظ کے عزم کا اظہار ہے۔

وزیراعظم محمد شہباز شریف نے بھی تیمور ویپن سسٹم کے کامیاب تجربے پر پاک فضائیہ کو مبارکباد دیتے ہوئے کہا کہ یہ کامیابی پاکستان کی دفاعی صلاحیتوں میں نمایاں اضافہ ہے۔ وزیراعظم نے چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر، چیف آف ایئر اسٹاف ایئر چیف مارشل ظہیر احمد بابر سدھو اور میزائل سسٹم پر کام کرنے والے سائنسدانوں اور انجینئرز کو خصوصی خراجِ تحسین پیش کیا۔

وزیراعلیٰ سندھ سید مراد علی شاہ نے بھی تیمور ویپن سسٹم کے کامیاب تجربے پر پاکستان ایئر فورس کو مبارکباد دیتے ہوئے کہا کہ یہ کامیابی دفاعی میدان میں خود انحصاری اور قومی طاقت کا واضح ثبوت ہے۔ انہوں نے کہا کہ پاک فضائیہ کی صلاحیتیں قابلِ فخر ہیں اور پاکستان کا دفاع ناقابلِ تسخیر ہے۔

قومی قیادت نے اس عزم کا اظہار کیا کہ پاکستان دفاعی شعبے میں جدید ٹیکنالوجی کے فروغ اور خود انحصاری کے سفر کو مزید تیز کرے گا۔